ერნესტო ჩე გევარა - 1952 წლის იანვარში დედისადმი მიწერილი წერილი
1952 წლის იანვარი
გზად ბარილოჩესკენ
ძვირფასო დედა! არაფერი იცი ჩემ შესახებ. არც მე ვიცი, როგორ ხარ, ამიტომ ვღელავ. რამდენიმე სტრიქონში ვერ ჩავტევ ყველაფერს, რაც შეგვემთხვა. უბრალოდ, გატყობინებ: როდესაც ბაიაბლანკადან წავედით, ორი დღის შემდეგ ავად გავხდი, 40 გრადუსი სიცხე მქონდა და ერთი დღე ლოგინში გავატარე. მეორე დილას მხოლოდ იმიტომ ავდექი, რომ დავწოლილიყავი ჩოელე-ჩოელის რეგიონულ საავადმყოფოში, სადაც მიმკურნალეს ცნობილი წამლით - პენიცილინით. ოთხი დღის შემდეგ მოვმჯობინდი...
სან-მარტინ-დე-ლოს-ანდესი მოვინახულეთ. გზად ჩვეული სიმარჯვით მოვაგვარეთ უამრავი პრობლემა. სან-მარტინ-დე-ლოს-ანდესში არის ლამაზი ტბა, გარშემო კი მშვენიერი უღრანი ტყეებია. კარგი იქნება, ეს ადგილი მოინახულო, დარწმუნებული ვარ, მოგეწონება. ისე გავირუჯეთ, ზანგებს დავემსგავსეთ. ყოველ სახლში, გვთავაზობენ საკვებს, ბინას და ყველაფერს დანარჩენს, რაც შეიძლება იყიდოს კაცმა. ახლა მოვედი ფონ პუტნამერების რანჩოში, ისინი ხორხეს მეგობრები არიან, მათგან ერთ-ერთი პერონის მომხრე, ყოველთვის მთვრალია და საუკეთესოა სამიდან. შევძელი დამედგინა მისი დიაგნოზი - სიმსივნე კეფის არეში. უნდა დავიცადოთ და ვნახოთ, რა მოხდება. ბარილოჩეს ორ-სამ დღეში დავტოვებთ და აუჩქარებლად ვიმოგზაურებთ. გამომიგზავნე წერილი მოკითხვამდე, 10 ან 12 თებერვლამდე აქ მომისწრებს. დედა, მომდევნო გვერდი განკუთვნილია ჩიჩინასთვის. ყველა ძალიან მიყვარხართ. შემატყობინე, მამაჩემი სამხრეთშია თუ არა.
უდიდესი სიყვარულით, შენი შვილი.